1400 ca.

CHRISTINE DE PIZAN, Epistre d’Othea, Cap. 48

Edizione critica a cura di Parussa G., Genève 1999, pp. 267-269

Texte

N’occis pas Coronis la belle

Puor le rapporte et la nouvelle

Du corbel, car se l’occioyes,

Après tu t’en repentiroyes

Glose

Coronis fu une domoiselle, comme dit una fable, que Phebus ama par amours. Le corbel qui adont le servoit lui rapporta que il avoit veu la belle Coronis. S’amie gesir avec un autre damoisel. De celle nouvelle fu tant dolent Phebus que il occist s’amie après aussi tost que elle vint devant lui, mais merveilles s’en en repenti après ; dont le corbel, qui guerdon entendoit a avoir de son seingnuer puor ce bienfait, en fu moudit et chacié, et sa plume qui estre souloit blache comme noif lui mua Phebus en noire, en signe de douleur, et si l’ordena tre lors porteur et nonceur de mauvaises nouvelles. Et peut estre entendue l’exposicion que le serviteur d’aucun poissant homme lui rapporta semblabes nouvelles, dont il fu chaciez et deffais. Pour ce veult dire que le bon chevalier ne se doit avancier de dire a son prince nouvelles qui le meust a yre ne courroux, par flaterie contre le bien d’autrui, car en la fin de tieulx rappors sont communement les guerredons petis ; et aussi ne doit croire rapport a lui fait par flaterie. A ce propos dit le philosophe Hermés : «  Un rapporteur ou controuveur de nouvelles ou il ment a cellui a qui il les rapporte ou il est faulx a cellui de qui il est dit »

Allegorie

Coronis, qui ne doit estre occise, nous entendrons nostre ame que nous devons occire par peché, mais bien la garder. Et dit saint Augustin que l’ame doit estre guardee comme le coffre qui est plain de tresor, comme le chastel qui est assegié des ennemis et comme le roy qui se repose es sa chambre de retrait, et doit estre ceste chambre cloce de.v. portes, qui sont les .v. sense  de la nature, et n’est autre chose clorre ses portes mais que ratraire les delectations des .v. sense. Et s’il avient que l’ame doye yssir pae ces portes a ses opperations foraines, elle doit mesurement et rassirement et en discretion yssyr. Et aussi comme les princes quant ilz veulent yssir de leurs chambre, ilz ont hiussiers devant eulx tenans maces puor faire voye en la presse, aussi quant l’ame doit yssir a veoir, oyr et parler et setir, elle doit avoir paour puor huissier qui doit avoir puor masse la consideracion des peines d’enfer et du jugement de Dieu. Et d’ainsi garder son ame  amonneste la sage : « Omni custodia serva cor tuum, quoniam ex ipso vita procedit » Proverbiorum. Iiij. Capitulo.