1316-1328
Ovide Moralisé, X, 929-1079; 3560-3678
- En cele terre d’Amatonte
Ot un riche home renomé,
Pygmalion par non nomé
Sages estoit et bien apris,
De grant richesce et de hault pris.
Pour les vices, pour les viltez
Et pour les grans iniquitez
Qu’il ot veüz en ces vilz fames,
pour les blasmes, pour les diffames
Qu’en li ot fet d’eles entendre,
Se tint lonc temps de feme prendre.
Grant partie de son aé
Vesqui sans feme, en chastée.
Endementres qu’il ert soutis,
Com cil qui mout estoit subtis,
Un yvoire blanc entailla.
Tant i mist, tant i traveilla
C’une ymage de feme a faite.
Si subtivement l’a pourtraite
Qu’ains ne nasqui plus bele fame.
Tel face ot, ne la veïst ame
Qui ne deïst qu’ele fust vive.
De l’ouvre qui tant fu subtive
S’emerveille cil qui l’ouvra.
Mout s’esbahist , quant tele oeuvre a
Ouvree si subtivement.
Mout l’esgarde ententivement.
A l’esgarder l’a amours pris
Et de nouvele amour sorpris.
Amors nouvele est ce, sans doute,
Qui si l'esprent et si l'assoute
Que tout son penser et sa cure
Li fet metre en sa formeüre,
En l'ymage qu'il avoit faite
Et de sa main propre portraite.
Souvent la tastonne et assoie
Se c'est statue ou feme vroie.
N e dist mie que soit yvoire :
Amours li fet penser et croire
Que de lui se puisse aaisier
Et qu'el li rende le baisier.
Quant il la baise il l'aparole.
Mout la losange et mout l'acole
Doucement, que mal ne li face.
Il li apareille et porchace
Quanque puet plaire à puceletes.
Roses et lis et violetes,
Marteles et pelotes pointes,
Coulons li done et tortres cointes.
Mout li fet biaux aornemens
De robes et de garnemens.
Bien le tienent amours por fol!
Fremal li done et las au col,
Gemme es dois, aniaux es oreiIles.
Bien li seoit à grant merveilles
La robe, quant elle iert vestue,
Et mout iert bele toute nue.
O soi la couche en lis couvers
De couvertors vermaulz et vers,
En coute de plume nouvele.
S'amie et s'espouse l'apele.
Un jour fu feste sollempnee
D'une deesse renomee:
Venus la deesse d'amour.
En Chipre ot feste celui jour,
Si festierent povre et riche.
Ne furent point aver ne chiche
De fere dons et sacrefices.
Grant fu la feste et li offices
Que l'en fist au temple Venus.
Pygmalion y est venus.
S'offrande a sor l'autel assise,
Si a une oroison emprise
Piteusement et o grant doute,
Com cil qui mout se crient et doute
De faillir à ce qu'il requiert.
En grant mesaise de cuer iert:
"Venus, à vous vieng à reclaim.
A vous dame de vous me claim,
Qui en tel effroi m'avez mis.
Par vous sui sans amie amis.
En grant dolour, en grant destrece
M'a mis vostre dars, qui me blesce,
Qui de moi m'a mon cuer soustrait,
Si n'a ou face son atrait.
Dame, se n'en avez pitié,
Faites cest dolereus haitié.
Dame, s'en vos merci ne truis
Ne sai voir où la quiere puis.
V ous et tous les diex en requier,
Quar tuit m'en pueent bien aidier.
Otroiez, dame, que la touse
Qui samble yvuire soit m'espouse."
Ne dist pas que ce fust yvoire!
Venus fist la requeste voire.
Mout debonaire fu vers soi.
Bien li moustra signe d'otroi.
Li signes le reconforta :
Li brandons que sans feu porta
S'est par soi tierce fois espris
Et par soi si est li feus pris.
Pigmalion est repairiez
A s'ymage joiaus et liez.
En un lit avec lui se couche,
Si li baise eulz et vis et bouche.
A vis li ert qu'ele amoloie.
Il la rebaise et la manoie.
Le pis sent qui li adoucist:
La roidours de l'ivoire en ist.
Ausi com la cire amoloie
Au soleil, quant l'en la manoie
Qui sous le doi font et s'abesse,
Ausi li yvoires se plesse
Sous son doit, quant il li assiet.
Cil s'esbahist et mout li siet,
Mes bien cuide que tout soit songe
Et tout fanfelue et mençonge.
Mout crient qu'il ne soit deceüz.
En la fin s'est aperceüz
Que ce fu cors et ame ensamble.
Les vaines tramblent, ce li samble.
Sous le pouce bien l'a sentu!
Bien moustra Venus sa vertu,
Quant l'ymage qui fu d'ivoire
Est devenue feme voire
Et ot sens et entendement
Et raison, se l'auctors ne ment.
Pygmalion ot joie grant.
A Veneri grant graces rent :
"Dame Venus, je vous aour
De la grant grace et de l'amour
Que fait m'avez, vostre merci.
Je vous aour, je vous merci,
Et vous l'avez bien desservi,
Quar mout m'avez en gré servi,
Quant j’ai ce que tant desirroie.
En grant effroi d'amours estoie.
Or m'avez en grant delit mis.
Ore ai amie, or sui amis.
Or n'ai je riens qui me desplaise.
Ore ai deduit et joie et aise."
Atant court s'amie besier.
La pucele sent le besier ;
Vergoigneuse fu, si rougist.
Pigmalion s'amie prist
Ou tempIe Venus à espouse.
Au noevisme mois ot la touse
Un fil preu et de grant renom.
Quant fu nez, Paphus li met nom.
De son nom fu l'ille nomee:
Pour Paphus fu Paphe clamee.
3560-3678
- Or vous dirai sans demorance
L’alegorie et la sentance
Que note l’ymage d’ivoire
Qui fu muee en feme voire,
Que ses forgierres prist à fame,
Et tant l’ama qu’il la fist dame
De son regne et de son avoir.
Aucuns grans sires pot avoir
En son hostel une meschine
Qui ot esté povre et frarine,
nue et desprise, et poi savoit,
mes gente iere et biau cors avoit.
Li riches homs, qui la vit bele,
Vesti et norri la pucele,
Qui sote estoit come une ymage,
Et tant l’enseigna qu’el fu sage.
Quant sage et discrete la vit,
Si l’ama tant qu’il la plevit
Et prist à fame et à espouse,
Puis ot un bel fil de la touse,
Preuz et sage et de grant renon,
Qui Cynaras pot avoir nom,
la cui fille tant le deçut
Qu’o lui jut et de lui conçut
Un damoisel, un enfançon,
Qui fu de tres bele façon.
- Autre sentence i puet avoir
Li forgierres, plains de savoir,
De cui toute science habonde,
Li forgierres de tout le mond,
A sa forme et à sa figure
Forga nostre humaine nature
Par sa sapience divine,
Si li dona forme eborine.
La matire fu limonee,
cui Diex forme humaine a donee
Vilz fu la matire et despite,
Où Diex mist forme tres eslite,
Et par sa bone volenté
L’empli de sens et de bonté,
De biauté et de bones mours,
Si l’ama puis tant par amours
Qu’il en fist s’amie et s’espouse,
Si besoit par amours la touse
Dou besier de sa sainte bouche,
Et la couchoit lez soi sor couche,
Paree et couverte de flours
Beles et bones olours.
Une hore, quant il li seoit,
Nue à descouvert la veoit,
Et bele descouverte estoit;
Quant bon li ert, si la vestoit
Et paroit de chiers vestemens
Et de riches aornemens,
Et moult estoit bele vestue
Tant ou plus qu’ele n’estoit nue.
Bele iert nue e sans couverture,
ce m’est vis, humaine nature
ançois le premerain pechié,
Dont elle ot puis la vis tachié.
Plus fu bele l’umanité,
Quant Diex l’ot de sa deïté
Et de sa nature affublee
Et de sa tache desnublee.
Precieuse est tel vesteüre,
Et plesans est la pareüre
Dont Diex a s’espouse aornee,
Bien vestue et bien atornee,
Et li joiel sont de grant pris.
Diex, qui de s’amour est sorpris,
Li donne, pour lui conforter,
Pour lui deduire et deporter,
Lis de pur virginité
Et de parfete integrité,
Violete d’umble atrempence
Et de paisible continence,
Rose de fine affection
Et de ferme perfection,
Colons de simple humilité,
Turtres de fine charité,
D’onneste conversacion
Et de voire dilection,
Si li done pelotes pointes
Et marteles roons et cointes,
Qui notent, si com je l’expos,
Perseverence en bon propos,
Fermalz de droite entencion
Et las de sainte affection,
Gemme en ses mains de bone ouvraigne,
A quoi Diex la dresce et ensaigne.
Esmauz aus oroilles dorez,
Verges d’argens et colorez
Li done, c’est sainte doctrine
Et predication devine,
Qui de sapience doree
Et d’eloquence est argentee.
Une hore l’acole et embrace,
Quant il la remplist de sa grace,
Autre hore la taste et manoie,
Quant par discipline l’asproie.
Bele est l’espouse au creatour.
Bon sont et riche si atour.
L’ame sainte et pure et eslite,
C’est l’espouse où Diex se delite
Et deduit amoureusement,
Et l’espouse de son ament
Conçoit, par grant devocion,
Voire mortificacion
De char, par sainte penitance,
Et de lui, sans nulle doutance,
Naist amere contriction,
Decoree componcion.
Quant la contriction s’assamble
O la penitance, il me samble
Que fruit delitables en ist,
Qui la sainte ame replevist
De douçour et de sovautume,
Qui l’ame en bone amour alume.
