1316-1328
OVIDE MORALISÉ, X, 722-752, 3362-3425.
Les cordes touche o son arçon,
Si note en harpant tel chançon;
"Les amours des grans diex vueil dire.
C'est ma chançon et ma matire, 725
Et de Jovis premierement.
Muse, mere, du commencement
M'adresce et me done tagrace
A dire tel chançon qui place
Au dieu qui pardurablement 730
A sor tous le gouvernement.
Jadis chantai, bien m'en recorde,
La contreverse et la descorde
Des dieux et des jaians. Or vueil
Tomer ma muse en autre fueil.
Chançon dirai plus delitable,
Plus legiere et plus amiable.
Jupiter, rois de paradis,
Diex sor touz diex, ama jadis
Ganimeden, l'enfant de Troie, 740
Si vault cil diex, qui tout mestroie,
Metre s'entente et son estude
En prendre autre similitude
Qu'il n'avoit, et desir ot d'estre
Le tout poissant, le roi celestre
Autre chose qu'il n'iert encores
Et qu'il ains n'avoit esté lores:
Voler vault et dou ciel descendre,
Si deigna forme d'aigle prendre.
Ganimeden prent et saisist. 750
Ou ciel l'en porte et là l'assist
Si le fist bouteillier dou ciel.
vv. 3362-3425
Or vous dirai dou jouvenciel
Qui fu fais bouteillier dou ciel,
Pour qui prendre et ravir et querre
Jupiter vint dou ciel en terre
Et prist forme d'aigle et vola
Et le jovenciel acola.
Jupiter fu uns rois de Crete,
Qui selonc la paiene geste
Fu pour dieu des diex aorez, 3370
Servis et criens et honorez.
Jupiter, rois cretensiens,
Vint guerroier les Frigiens,
Lor que Tros en Troye regnoit.
Jupiter o l'ost qu'il menoit,
Com preuz et combatans, sans failIe.
Vainqui ceulz de Troie en bataille.
Un joenne enfant par aventure
I prist, tres bele creature.
Jupiter jone et biau le vit. 3380
A Tros son pere le ravit.
En sa contree l'emporta
Et mainte fois se deporta
Avuec lui par non de luxure,
Contre droit et contre nature.
Si le fist malgré sa moullier
De sa cort mestre et bouteillier.
- Autre sens i puet l'en gloser
Et par natures exposer.
Si com distrent li premerain, 3390
Jupiter c'est l'air souverain,
Qui trop est chaulz et plains d'ardure,
Mes moult prent bone atemperure
Par l"umoistour dou jovenciel,
C'est d'Aquaire, un signe dou ciel,
Qui est frois et plains d'umoistour.
Pour ce li ancien douctour
Faindrent que il fust, ce m'est vis,
Amis et bouteilliers Iovis.
L'aigle est chault, vole hautement.
Jupiter est un element. 3400
Sor touz est assis le plus hault
Et sor tous autres le plus chault.
Si se mua, selone la fable,
En aigle chaut et hault volable.
- Par allegorie puis metre
Autre sentence en ceste letre.
Jupiter, diex, peres aidierres,
Tous poissans souverains crierres,
Qui crea toute creature,
Pour amour d'umaine nature 3410
Vault des cieulz descendre et venir
Au monde et deigna devenir
Ce qu'il n'avoit onques esté,
C'est: homs, et la chetiveté
D'umaine nature acola.
Et com aigle aus cielz s'en vola,
Portans la char qu'il avoit prise,
Si l'a sor son hault trosne assise:
C'est li bouteilliers, ce me samble,
Vrais diex et vrais homs tout ensamble, 3420
Qui d'esperituelz delis
Aboivre et repaist ses esIis.
C'est cilz de qui tous biens habonde,
Qui sa grace espant par le monde.
