1400 ca.
CHRISTINE DE PIZAN, Epistre d’Othea, Cap. 76
Edizione critica a cura di Parussa G., Genève 1999, pp. 306-308
Texte
Ne te chaille de nul gaitier,
Mais t’en va toudis ton sentier;
Cephalus o son glavellot
Le t’apprent, et la femme Loth.
Glose
Cephalus fu un ancian chevalier, et dit une fable que toute sa vie se estoit moult deduit et delictè en deduit de chace et a merveilles savoit bien giter un glavellot que il avoit, qui avoit tele proprietè que ja ne fust gettè en vai net tout occioit quanque il attaignoit. Et pour ce que accoustumè avoit de se lever par matin et aler en la forest la sauvagine gaiter, sa femme en fu en grant jalousie de doubte que d’autre que d’elle fust amoureux. Et pur la veritè savoir, ala après pour lui gaitier. Et Cephalus, qui ou bois estoit, quant il ouy la fueille bruire ou sa femme se cachoit, cuida que sauvagine fust. Atant lanca son glavelot et sa femme ataint si l’occist. Dolent fu de la mesaventure Cephalus, mais remede n’y pot estre mis. La femme Loth, comme tesmongne la Sainte Escripture, se retourna arriere contre le commandement de l’ange quant elle ouy derriere soy fondre les .v. citez, et pour ce fu tantost tournee en une mace de sel. Et comme toutes telles choses soient figurees, y peut estre mis assez d’entendemens; mais a la prendre a la veritè pour exemple: nul bon chevalier ne se doit delicter a altrui gaitier en choses qui ne lui peut appartenir. Et comme nul ne vouldroit estre gaitez, dit Hermès: “Ne fais a ton compaignon ne que tu voudroyes que il te feist, et ne vueilles tendre les las pour prendre les hommes ne pourchacier leur dommage par agait ne par cautelle, cara u derrenier tourneroit sur toy”.
Allegorie
Que il ne lui doit chaloir de nul gaitier peut estre entendu que le bon esperit ne se doit donner peine de savoir le fait d’autrui ne d’enquerir d’autrui nouvelles. Et dit saint Jehan Crisostome sus l’Evangile de saint Mathieu: “Comment, dist il, es fais d’autrui vois tu tant de petites deffautes et en tes propres fais tu lasse passer tant grandes deffaultes? Se tu t’aimes mieulx que ton prochain, pour quoy t’empesches tu de ses fais et laisses les tiens? Soies premierement diligent de considerer tes fais, et puis considere les fais d’autrui”. A ce propos dit nostre Seigneur en l’Evangile: “Quid autem vides festucam in occulo fratris tui, trabem autem in occulo tuo non vides?” Mathey .vij. capitulo.
