1316-1328 ca.
OVIDE MORALISÉ, Piramus et Tisbé, Ms R (Rouen, Bibliothèque municipale 1044, folios 91r. 96v), vv. 1-904
En babilone la cite [min] preceding
Furent dui home renome
De grant ualour de grant hautesce
De parente et de richesce
5 Li riche home orent .ii. enfans
Dune biaute et duns samblans
Luns fu ualles lautre meschine
Tant biaux norent rois ne royne
.II. enfans orent li riche home
10 Quouides en son liure nome
Et dist quil furent apele
Lun piramus. lautre tysbe
Ancois quil eussent .uii. ans
Toucha amours les .ii. enfans
15 Et naura plus en lor endroit
Que lor aez ne requeroit
Li pers a eulz ligaulz corages
Lor grans biautez lor grans parages
Les paroles les ris les ieus
20 Et li aaisement deulz deus
Et li entreueoir souuent
Lor donnerent esmouuement
Hay amours deuant tes iex
Ne puet durer ioenes ne uiex
25 Il nest iouuente ni aez
Qui de ton dart ne soit naurez
Contre ton dart na nulle essoigne
Double haubers ne double broigne
Ta saiete ne set faillir
30 Uers lui ne puet nulz homs garir
Sans doleur fais traire souspir
Sans sanc espandre fais palir
Li fers de ton dart porte feu
Souspirs la fleche dou mileu
35 Li fers naure dou regarder
Et la fleche coule en passer
Li penon font les apareulz
La coiche ajouste ses conseulz
De tel saiete et de tel lance
40 Naura amours en lor enfance
Le jouencel et la meschine
Tres que la mort lor fu uoisine
Encor ne seuent riens damours
Si les a mis en grans freours
45 Ia lor plaist par matin leuer
Et lun de lautre porpenser
Et jeunent plus que lor droit
Et lor aez ne requeroit
Par matinet chascun sen emble
50 Si uont le iour iouer ensamble
Deduient soi o les enfans
De lor aez et de lor tans
Le jour pensent deulz esgarder
Quil ne sen pueent saoler
55 Tart reuienent a lor ostaulz
Quar li departirs lor est maulz
Plaist lor a faire mainte chose
Dont len moult les manace et chose
Tant com jaspes sormonte uoirre
60 Et or argent. et primeuoire
A la marouste sormonte
Tant sormontoient de bonte
Et de ualour et de biaute
Cil dui. tous ceulz de la cite
65 Par grant conseil et par grant cure
Et par grant sens les fist nature
Tant com lor aez fu contraire
A ce quamours requiert a faire
Et il furent dedens .x. ans
70 Fu assez lor leesce grans
Daler ensamble et de parler
Desbanoier et de ioer
Li douz regars li simples sens
Et li non conuenables temps
75 Et que nulz biens nest sans enuie
Ne nulz sens nest sans felonie
Les fist departir et garder
Quil ne porent ensamble aler
.I. sers percut lor contenance
80 Et dist or sai ie sans doutance
Que moult sentraiment cil enfant
Et se il fussent auques grant
Et il eussent tel lesir
Griez chose fust dou departir
85 A la mere a la damoisele
Porta li sers ceste nouele
Et cele dist des or ten tes
Quar il nassambleront iames
Puis dist a une chamberiere
90 Garde se tu mas de riens chiere
Que tysbe nisse fors de lus
Et quel ne uoie piramus
A dont leua uns maltalans
Entre les peres aus enfans
95 Une tencon et une enuie
Qui puis dura toute lor uie
Ceste chose fist destorber
Les .ii. enfans a aprimer
Et dassambler par mariage
100 Et denuoier entreulz message
Li dui enfant sont en destroit
Li uns not lautre ne ne uoit
Moult lor samble griez la deuise
Que lor parens ont entraulz mise
105 Mes ce que len les garde plus
Tysbe nose issir fors de lus
Ne piramus uers lui garder
Fet plus lor amour auiuer
Andui croissent selonc lor tens
110 Croist lor aez et croist lor sens
Croist lor ardours et croist lor plaie
Et croist li feus qui riens napaie
Croist lor amours et lor aez
Et ia orent .xu. ans passez
115 Et puis quil uindrent en iouuent
Et il choisirent escient
Et lor aez sahert au cours
Ou nature choisist amours
Adont nes lesse plus guerir
120 Li lonc penser li grief souspir
Les grans dolors li fort complaint
Li durs tormens au cuer lor maint
Dementent soi et nuit et iour
Toute lor uie est en dolour
125 Plorent plaignent chascuns par soi
Ne seuent deulz prendre conroi
Ne ne pueent trouuer remire
Ne par mecine ne par mire
Li feux lor siet dedens les os
130 Qui ne lor lesse auoir repos
Ains les trauaille ior et nuit
Et de mortel trauail les cuit
Cil feux et cele flame seule
Retrait les ners et art la meule
135 Tault la uertu change biaute
Et chace tout a grant griete [min]
Piramus est plains de tristour
Plains de souspir et plains de plour
Plains de penser et plains de cure
140 Demente soi en tel mesure
Helas fet il chetif dolent
Soufferrai longues cest torment
Tous tens ai duel ioie noient
Et com plus me dueil plus mesprent
145 Ie mens certes ains est ardour
Qui ensi uient de iour en iour
Si taint ma face et ma coulour
Com fait la fueille la froidour
He piramus quel la feras
150 En quel guise te contendras
Hay pere qui mengendras
Pourquoi
Nas tu ore pitie de moi
Se tu ne prens autre conroi
155 Ou par enging ou par desroi
Tysbe bele que te uerrai
Ou se ce non pour toi morrai
Saches se par amours ne tai
Que par force te rauirai
160 La mort 160
Iert mon refuge et mon confort
Saulques me tient cis malz si fort
Ou se longues mest cis tors fais
He: dieux pourquoi nest fais cis plais
165 Que nos parens fussent em pais
Neussons mie tant dagais
Ne ie ne puis tant esploitier
Que ji trouuaisse messagier
Que ie li peusse enuoier
170 Cui chault
Ne monte riens se dieux me sault
Hay peres qui mains en hault
Estain le feu qui si massault
Le feu
175 Qui ma tolu et ris et jeu
Ne puis guerir en nesun leu
Amie
Pour uous est ma coulour perie
Mon cors naure ma chars percie
180 Bele pour uous despens ma uie
Ien plours
Consentez moi li dieux damours
Quencor la tiengne nuit ou jours
Ou a leesce ou a dolours
185 Pasmer
Mestuet. errant ne puis parler
Or sui hetiez or uueil plorer
Ore ai grant chault or uueil trambler
Ains quil peust son duel fenir
190 Li prist la face a empalir
En lermes et en plorement
Chey pasmez ou pauement
Empres grant piece est releuez
Tous tristes tous descolorez
195 Uait sent au temple ueneris
Couche soi sus le marbre bis
Une priere a commencie
Quele li doinst auoir baillie
De parler a tysbe samie [min]
200 Tysbe rest la dedens enclose
Fors dou palais issir nen ose
Souuent remembre ses amours
Souuent mue le iour colours
Souuent se plaint et souent plore
205 Lasse fet elle com male ore
Fui nee
He diex com male destinee
Com dure uie mest donee
Ains mes ne fu nulle esgardee
210 En uie
Qui par sauoir ou par uoisdie
Ne seust engigner boisdie
Fors moi
Mes quant ie plus pens et mains uoi
215 En quel guise prendrai conroi
Amis douz de parler a toi
Parler
Tysbe fole ueulz tu desuer
Et ta chastee uioler
220 Et ton lignage uergonder
Non faire
Garde raison qui test contraire
Ne te chaille entour toi atraire
Chose dont tu faces tel rage
225 Onques feme de ton lignage
Ne fu reprise de putage
Reprise
Non serai ie par nulle guise
Miex uueil estre .c. fois ocise
230 Tysbe
Ou as tu pris icest pense
Tost as pyramus oublie. amis
Onques a certes ne le dis
Or poez dire ce mest uis
235 A droit
Quen amours de feme na foit
Biaux douz amis prenez a droit
Le gage
Tenez sire pour cest outrage
240 Uous otroi ci mon pucelage
Trop iere ore de fier corage
De fier
Uers uous doi ge bien supploier
Moult auroie le blasme chier
245 Se men ooie reprochier
Contraire
Si com me samble a mon uiaire
Nulz hom ne men deuroit retraire
Ne reprendre de cest afaire
250 Desuee
Tes toi fole desmesuree
Quel corage uous a muee
Moult estes ore forsenee
Lerai
255 Tout cest pense que ie ore ai
Par le conseil mon pere aurai
Autresi gent ami bien sai
Si gent
Merueil se piramus mentent
260 Oil. ie tramble bien le sent
Si mar le dis or men repent
He: biaus
Rose tendre et lis nouuiaus
Flors de tous autres damoisiaus
265 Merci
Naies cure de quanque di
De paour ai le cuer marri
Iamais naurai nul autre ami
Que uous
270 Mes uos parens sont enuious
Et li mien sont de moi ialous
Cui chault
Ne monte riens se diex me sault
Or senc mon cuer ore ai trop chault
275 A poi ferai pour uous .i. sault
He lasse
Que ai ie dit riens ne me passe
Li maulz qui si souuent me lasse
Dolente
280 Li diex damours le me consente
Ou bon me soit ou men repente
Quentre mes bras encor le sente
Par termes
Ci fenirai ma plainte en lermes
285 Pasmer mestuet ore est li termes
Ensi fais ie par chascun di
Tel fief tieng ie de mon ami
La pucele est trois fois pasmee
Et quant elle sest releuee
290 Ansdeus ses mains uers le ciel tent
Aus diex prie moult humblement
Quil li doignent conseil trouuer
Qua son ami puisse parler
Prochain furent li dui palais
295 Et par tele maniere fais
Cune parois et .j. murs seulz
Estoit deuise dambedeus
Endroit la chambre la dedens
Ou mains conuersoient de gens
300 Ou la pucele iert enfermee
Fu la parois .i. peu creuee
La creuace nert gaires grans
Si fu celee par mains ans
Desi quamours la fist trouuer
305 Uers cui riens ne se puet celer
Quel chose est ce quamours ne sent
Li dui amant premierement
Apercurent celui pertus
Primes tysbe puis piramus
310 Tysbe trouua la creueure
Prist le pendant de sa cainture
Sen fist outre le fer paroir
Que ses amis le pot ueoir
Piramus uint de deporter
315 Pour ses dolours reconforter
Entre en la chambre cele soi
Torne ses iex uers la paroi
Garde si apercoit lenseigne
Qui la creuace li enseigne
320 Cele part uait prent le pendant
Uoit le petruis aparissant
Tysbe dist il bele faiture
Flours de toute autre creature
Par lenseigne de la chainture
325 Sui ie uenus offrir droiture
Que ne trouuai la creueure
Uostre en est bele lauenture
Daperceuoir tel troueure
Se uous auez de moi tel cure
330 Ne uous tendra la fermeure
Que ne ueigniez ici segure
Sans message sans onuerture
A basse uois et a murmure
Porrons parler de nostre iniure
335 Emprez saurois en quel ardure
Ma mis amours sans forfaiture
He diex comme est sa uie dure
Qui longuement teulz maulz endure
La pucele de lautre part
340 Est en escout et en esgart
De la parole entent lesfroi
Torne ses iex uers la paroi
Met son oeil endroit la creuace
De son ami connut la face
345 Parler cuide mes el ne puet
Pour lamour qui si la commuet
Ou premerain esgardement
Fremist souspire et si esprent
Tressault tramble et si tressue
350 Taint sa color et si li mue
Porpense soi quele li die
En soi meismes sentroblie
En tantes guises la destraint
Amours. qui toutes choses uaint
355 A la parfin sest pourpensee
Si sest un poi asseuree
Met sa bouche endroit la fendure
Emprez parole en tel mesure
Amis ensi uous os nomer
360 Ce ne me puet on pas ueer
Ne me puis pas uers uous celer
Uostre proesce uueil gaber
Premiere soi conseil trouuer
Com peussons ci assambler
365 Quar cui plus aime plus uoit cler
Griement uous oi desconforter
Mes poi sauez que est amer
Encor uous en poez ioer
A moi lessiez le duel user
370 Cui riens ne puet confort doner
Ioie ai changiee por plorer
Pour dolereus complains ieter
Et leesce pour gamenter
Soef dormir por grief penser
375 Ieu et delit pour souspirer
Amis ne puis or plus ester
Souspirs me tolent le parler
Pensez demain dou retorner
Plus a loisir porrons parler
380 Et li uns lautre conforter
Ne pot lors plus parler a lui
Ensi departent ambedui
Li jours sen uait la nuis prist fin
Ansi repairent au matin
385 Et reuienent a lor pertus
Primes parole piramus
Amie moult sui angoissous
Quar a mort sui naurez pour uous
Des or uieng ie bien a reclain
390 Plus sui pris que poissons a lain
Sorpris
Sui je pour uous ce mest auis
Ne sai que soit ioie ne ris
Sauques me tient nen irai uis
395 Muir moi
Li diex damours ne garde foi
Quar sormontez nous a sa foi
Lacie somes en une roi
Andui
400 Ne sai cui prier uous ou lui
Bele a uous fais ie mon refui
Se por uous muir tant mar i fui
Amie
Moult feriez grant felonie
405 Se pour uous perdoie la uie
Quant par uous puis auoir aye
Dolent
Moult puis auoir duel et torment
Qui tant ai ame longuement
410 Et ne puis faire mon talent
Chetis
He bele com sui entrepris
Com sui pour uostre amour conquis
Dolour
415 Ne me default ne nuit ne iour
Or pens souspir et emprez plour
Toute ai perdue la coulour
Dormir
Boiure et mengier mestuet gerpir
420 Ne puis parler que ne souspir
Bien ai apris mal a souffrir
Deduit
Et quanque ie desir me fuit
He diex a cui complaing ie lui
425 Ne la garra se ne men fui
Foir
Amours ne me ueult pas gerpir
Pour amours mestoura morir
Morir
430 Se dieu plaist et uous non ferai
Ancois uous en soupploierai
Ia tant ce cuit nen prierai
En uain
Ains tendrai tant droit ma main
435 de de. cest mal me ferois sain
Et de uostre amistie certain
He murs
Tant par estes aspres et durs
Mes se ie fuisse auques seurs
440 La frete
Fust a mes mains si ample fete
Que sans ueue de la guete
Uous en eusse parmi trete
Parois
445 Aiez merci de ces destrois
Pertuis tant par estes estrois
Chaillous se uous aouuressois
Seul tant
Quensamble fussiens en parlant
450 Et alissons entrebesant
Amie
Se fusse en uostre compaignie
De grant doleur fusse garie
Hostel
455 Pour tant te deuons nous amer
Qui parmi toi nous lais parler
Cele toi bien con ne te sace
Nez pas de ceulz qui nous manace
Par toi
460 De cele qui le cuer de moi
Et le corage a trait o soi
Mesiere
Tant par estes cruel et fiere
Qui naouurez par ma proiere
465 Tant que besier puisse la chiere
La bouche
La cui douceurs au cuer me touche
He gente
Itant me fetes sans atente
470 Ne plus
Prions orendroit de ca ius
Que nous ait dame uenus
Que nulz ne truisse cest pertus
Li jouenciaux plaint et souspire
475 Lores fremist ne pot mot dire
Et quant li siens contes remaint
Tysbe commence son complaint
Amis trop uous desconfortez
Merueilles est que trop mamez
480 Bien sai qua mort estes naurez
Pour moi
Et ie por uous en moie foi
De ma uie ne sai conroi
Ne sui mie en menor esfroi
485 Que uous
Moult estes tristes et plorous
Et mes cuers est moult angoissous
Griement
Uous complaigniez de cest torment
490 Mes ie espoir plus durement
Amis
Qui si dites questes conquis
Li miens cuers est damors sorpris
Sans faille
495 Plus est espris que feus em paille
Amors mocist et me trauaille
Diex grans
Quel ire est ce quel maltalans
Que as a moi de si lonc tans
500 Diex pere
Qui me feis nestre de mere
Uoies mon duel et ma misere
Ma paine
Males herres et male estraine
505 Recui
Amis quant primes te connui
Ains puis ne nuit ne iour ne fui
Sans plaie
Nest merueille sele sesmaie
510 La touse
Qui pour uous est si angoissouse
Riens ne la puet faire ioiouse
A tort
Ai ie perdu ioie et confort
515 Par grant angoisse atens la mort
Le iour
I sui en lerme et en freour
Et en angoisse et en dolour
Et en torment et en tristour
520 La nuit
Nai ie ne deport ne deduit
Quant ie me gis dedens mon lit
Riens noi
Sen sui en paine et en esfroi
525 Si mest auis que ie uous uoi
Et ne poez parler a moi
Dont sui pires que ne soloi
Tressaill
Tressu dangoisse et de trauail
530 Dont tens mes mains que ie uous bail
Et quant uous doi prendre si fail
Amis
Quant me rendors si mest auis
Que uous estes deuant mon uis
535 Tous dehaitiez et tous pensis
Diex donge
Que biens me uiengne de cest songe
Dont mest auis que me semonge
Ne sai quel uois en complaignant
540 Qui ce me dist apertemant
Ensi
Tysbe cognois tu ton ami
Esueille toi salons de ci
Tysbe
545 Li dieu nous ont amoneste
Que issons fors de la cite
Souz le morier
Droit a la fontaine au grauier
La nous porrons esbanoier
550 Amis
Dites quil uous en est auis
De mamor uueil que soies fis
Pour uoir
Ie memblerai dou premier soir
555 A la fontaine irai seoir
La fors
Si trouuerai le uostre cors
Amis ta uie est mes tresors
Gardez
560 Ne soiez lenz ne demorez
Dou premerain some leuez
A la fontaine me querez
Sous le morier enmi les prez
La ou ninius fu enterrez
565 Certainement mi trouerez [min]
Ensi ferment lor conuenant
Puis departent li dui amant
Et saluerent le pertuis
Quil ne uirent des or mais puis
570 Mes primes baise la paroi
Chascuns au departir de soi
Li dui amant sont en grant cure
Trop lor samble que li iours dure
Moult se complaignent dou soleil
575 Souuent lapelent non feeil
Quar trop se targe desconser
Et si fait la nuit demorer
Dient qua escient le fait
Pour destourbance de lor plait
580 Li jours sen uait la nuis repaire
Et li termes de lor afaire
Montent les guetes sor les murs
Cil se dorment qui sont segurs
Mes nulz des .ii. ne se repose
585 Ains est en apens dautre chose
Chascuns en soi meismes soigne
De bien emprendre sa besoigne
Or sont li cuer en esperance
Et non pourquant sont em balance
590 De ce sil le facent ou non
Mes uolentez oste raison
Delitent soi ou dous penser
De ce quil doiuent assambler
Et deuisent en lor corages
595 Lor mors lor deulz et lor damages
Il ont andui ioie et dolour
Mes toutes ores uaint amour
Sens ne raison nes puet retraire
De ce quil ont empris a faire
600 Ia ert la gent toute endormie
Quant tysbe sest desauancie
Lieue dou lit ou elle gist
Tout belement de la chambre ist
Ne la tint huis ne fermeure
605 De la chambre ist toute segure
Sole par nuit et sans paour
Tel hardement li done amour
Quant fu issue dou palais
Et elle deualoit em pais
610 Si mist auant le pie senestre
Puis esgarda par deuers destre
Senti tout le palais fermir
Et uit la lune a empalir
Quant ot esgarde tout entour
615 Onques pointe nen ot paour
Quel ne parface son afaire
A quel fin quele en doie traire
Ia ert desi quas murs uenue
Quant une gaite la ueue
620 Et quant a cele hore la uoit
Cuide cune deesse soit
Trait soi arriere ne lapele
Ensi sen uait la demoisele
Deuant les iex de cele guaite
625 Sen ala bien par une fraite
Et uint au leu sans demorance
Ou fu prise la conuenance
La iert assise sus le marbre
A la fontaine dessous larbre
630 Ou il deuoient assambler
Puis se commence a porpenser
En quel guise elle gaberoit
Le iouenciel qui ne uenoit
Quant uns lions de la montaigne
635 Qui ot ocis une compaigne
De bestes uint parmi les prez
Encore estoit enuolepez
Des entrailles et de la laine
Abeurer uint a la fontaine
640 La pucele bessa la teste
Quant uit uenir la fiere beste
Fuit li li sans pert la colour
Nest merueille selle ot paour
Uait sent fuiant par une uoie
645 Et crient que li lyons la uoie
Mes tant est esbahie et simple
Quenmi sa uoie laist sa guimple
Uait sent ilnelement mucier
Sous lombre dun alemandier
650 Li lyons uint a grant esfroi
A la fontaine estaint sa soi
Et quant il est bien assasez
Si se deduit aual les prez
Trouue la guimple en une sente
655 Si la defoule et ensanglente
Et quant il est des prez issus
Et pyramus y est uenus
He dieux com grans mesauenture
Li aproche pesant et dure
660 Quar a la clarte de la lune
Si con apareilloit fortune
Garda sous lombre dou morier
Si uit la guimple blanchoier
Et sus la poudriere enuiron
665 Cognut la trace dou lyon
Esgrapillie uoit laraine
Trouble liaue de la fontaine
Trouue la guimple defolee
Et de nouuel ensanglentee
670 Cuide que soit dou sanc samie
Garde enuiron ne li uoit mie
Helas com malement demore
Nert pas uenue en icele ore
Tant crient icele beste fiere
675 Quencor nosoit torner arriere
Quant pyramus ne uoit samie
Dont cuide il bien quel soit fenie
Plus deuint uers que fueille dierre
Et enredi comme une pierre
680 Mue li sans change corage
Lores esprent dire et de rage
Emprez parole itant comme ire
Et maltalens li lesse dire
Nuis de dolour nuis de torment
685 Moriers arbres de plorement
Prez qui dou sanc estes sanglent
Fontaine
Que ne mauez rendue saine
Celui qui sanc gist en laraine
690 Sodainement est fete uaine
Mentente
Mesperance mamour matente
He diex quel duel me represente
Ceste guimple que uoi sanglente
695 Amie
Com fu la beste tant hardie
Qui uers uous fist ceste enuaye
Quel mal quel duel quel felonie
Quen tel maniere estes perie
700 Ma cure
Cest grant damage que tant dure
Qui ci uous fis uenir segure
Sole en tel liu par nuit obscure
Seule
705 Hay de la mauuese goule
Qui de uostre char est saoule
Helas
Ci uoi dou sanc et uoi des dras
Lyon tu qui la deuoras
710 Merueil se plus en i lessas
Lune crueulz qui lesgardas
Sa cele hore nen obcurcas
Cest tort
Quant ele est morte et ne sui mort
715 Ne sai quel duel me soit plus fort
La mort est mon mieudre confort
Chetis
Quant elle est morte et ie sui uis
Por dieu terre quar menglotis
720 tu lyons qui loceys
Repaire
Ie sui tous pres sans nul contraire
Ta uolente pues de moi faire
Reuien
725 Qui deuoras la douce rien
Son sanc beuz or boi le mien
Dolens
Ma douce amie trop sui lens
Qua uostre mort ne fui presens
730 Mors quar repaire si me prens
He mors
Pourquoi demore cest grans tors
Que ie ne sui orendroit mors
Suer chiere
735 Ie uous ai morte qui derriere
Uing a mon terme et uous premiere
Or pri ma destre que bien fiere
Uengier
Mes primes uueil aus diex proier
740 Quil demoustrent en cest morier
Signe de mort et destorbier
Facent le fruit de tel coulour
Comme il afiert a la dolour
Tel duel et tel priere faite
745 Puis emprez a sespee traite
Si a la guimple sus leuee
En son la more de lespee
Bese la guimple aueuc le sanc
Tresperce soi parmi le flanc
750 Tresque de lautre part dou cors
Fet aparoir lespee fors
La ou il muert baise la guimple
Si fete amour a mort le simple
Sor les branches raie li sans
755 Nercist li fruis qui estoit blans
Tous temps auoit este la more
Blanche. iusques a icele hore
Adont si ot noire coulour
En tesmoignage de dolour
760 Tysbe repairoit a ytant
Quel ne deceust son amant
Moult couuoite quele li die
De quel peril elle est garie
Cuide acomplir sa uolente
765 De ce quele ot tant desirre
Mes ore aproce terme brief
Que lor amours uendront a chief
Ia li est uis quel soit o lui
Et sentrebracent ambedui
770 Et parolent de lor amours
Mes orendroit aura dolours
Tout belement sen uait arrier
Et quant elle aproce au morier
Donques se tint pour esgaree
775 Pour la coulour quel uit muee
Quar primes auoit ueu blanc
Le fruit qui ore est taint de sanc
Endementres que elle doute
Si a tenue droite route
780 Le jouenciel oit senglotir
Plaindre gesmir trere souspir
Uit la guimple comme il la touche
Dores en autres a sa bouche
Et quant elle apercoit la plaie
785 Nest merueille selle sesmaie
Quant uoit parmi le cors lespee
Fuit li li sans si sest pasmee
Relieue soi dolante et mate
Trait ses cheueux si se degrate
790 Derront sa char si plore et crie
Plus aime mort que ne fet uie
Lores sescrie sor le cors
Si a traite lespee fors
Encontremont len a drecie
795 Puis parole com feme irie
Espee dont ie sui saisie
Or esproeuue comme hardie
Espee
Qui nostre amour as terminee
800 En mon pis soies reschaufee
De nos .ii. sans ensanglentee
Sanglente
He diex quel fin et quele atente
Com tost perist nostre jouuente
805 Biau sire
Petit uous puet espargnier ire
Quant uostre main uous uault ocire
Lasse com puis parole dire
La ou ie uoi que il souspire
810 Iou uoi
Que il trauaille mort por moi
Com foible amour com poure foi
Auroie
Amis se ie ne uous siuoie
815 Sa court terme ne mocioie
Biaux chiers
Com grant dolours quelz destorbiers
Trop fu uostre corages fiers
Lune. fontaine prez moriers
820 Nuit pale
Qui enseigne me feis male
Quant fui issue de la sale
Oiez
Pri uous que ma mort tesmoigniez
825 Diex de mon cuer comme est iriez
Tysbe mauuese que targiez
Mauuese
Tant solement morir uous plese
Quor ne uous fault ne point ni ese
830 Morir
Nulle chose tant ne desir
Com mes doleurs a defenir
A tort me targe dou ferir
A tort
835 Amours fetes mon poing si fort
Qua un seul cop recoiue mort
Sen aura same grant confort
Andui morromes dune mort
Amis
840 Bien sai quamours uous ont ocis
Quant assambler ne poons uis
Mors nous ioindra ce mest auis
Parens
Qui nous cuidiez garder leens
845 A court terme serois dolens
Com dolereuz encombremens
Uerrois
Quant ambedeus nous trouuerois
Ensamble mors et acolez
850 Pri uous que cest don me donez
Quant en ioie fumes seurez
Et mort somes dessamblez
Que nous contiengne .i. seulz
tombliaux
Andeus nous recoiue .i. uesseaux
855 Adont sencline la pucele
Bese sa bouche si lapele
Pyramus ues ci uostre amie
Quar lesgardez si ert garie
Li iouenciaux la ou moroit
860 Entroeuure les iex et si uoit
Que ce iere tysbe samie
Qui lapeloit toute esmarie
Parler i ueult mes il ne puet
Quar la mort qui le tient ne let
865 Mes tant a dit tysbe amie
Pour dieu qui uous remist en uie
Atant se taist ne puet plus dire
Puis la regarde si souspire
Li cuers li part si pert la uie
870 Cele lesse toute esmarie
Cil est mors et cele est pasmee
Diex quele amours est ci finee
La pucele sest redrecie
Lespee a a .ii. mains sachie
875 Parmi le pis sous la mamele
Se tresperce la damoisele
Dambedeus pars sault li sans fors
Et cele chiet dessus le cors
Le cors acole et si lembrace
880 Les iex li baise et bouche et face
Baise la bouche par grant cure
Tant com sans et uie li dure
Se demoustre ueraie amie
Cil est fenis cele est fenie
885 En tel maniere sont fine
Li dui amant par loiaute
Ensi se moustrent urai amant
Quar il sont de fin cuer amant.
Quar li uns deulz ne uaudroit estre
890 Ou paradis au roi celestre
Et li autres si fust ici
Se il nestoit aueuques lui [min]
Ensi com la fable recorde
Qui a uoire istoire sacorde
895 Sentramerent les .ii. amans
Si fu teulz lor departemans
Que lun se mist pour lautre a mort
Et quant il furent andui mort
Li parens qui mors les trouerent
900 En .i. seul tomblel les poserent
Et la more qui lors ert blanche
Deuint noire dessus la branche
Si recut sanguine colour
En signe de cele dolour.
