1315-1328
OVIDE MORALISE
XXVI. Exposicion allegorique et puis morale sur la dite fable
Selon l’allegorie prinse sur la fable cy dessus ditte, la Gourgoigne signifie paour qui fait homme reffraindre de quelque chose faire. Et ce se fait en troys manieres, dont l’une paour affoiblist le cueur, l’autre paour le fait apesanter et affonder, comme une piere qui chiet en eaue, et la tierce paour le fait anublir, c’est à dire obscurcir et qu’il ne peut veoir ne appercevoir la verité de la mensonge. Ces troys manieres de paours ung regne ont à tenir en commun, c’est assavoir le cueur de l’omme, où elles cheënt, lequel par elles est fait plus dur que pierre d’aymant. Mais par Perseüs est yci entendu eslievement de vertueuse sapience, par laquelle l’omme se pourvoit contre tous les perilz monfdains qui par icelles troys seurs luy peuent advenir, si leur soubztraict leur tenement. Car en lieu de crainte il est par sapience armé de hardement et de vertuz ensemble, dont il est conforté et par consequent se treuve monté sur Pegasus, le cheval volant, sur lequel le dit Perseüs vola en l’air et par mer et par terre, comme dit est cy dessus. Derechief par les serpens qui furent engendrés du sang cheant du chief de la Meduse sont entendues les mauvaises pensées qui procedent de mauvais couraiges. Mais par Pegasus, dont le pié troua la fontaine, est entendu chacun homme de bon vouloir qui mect paine de bien estudier pour science acquerir et bon renom avoir. Mais selon autre sentence est yci à entendre que quant le Filz de Dieu glorieux fut du ciel descendu en terre, il daigna entrer en la tour fermée de virginité, ce fut ou precieux ventre de laglorieuse Vierge Marie, dont il print nostre humanité pour nous rachapter de la prison d’enfer. C’est cellui qui deherita les troys filles de deussus nommées, c’est à dire vaine gloire, convoitise et delectacion charnelle, qui sont filles du diable, lesquelles par avant la dicte incarnacion du Filz de Dieu regnoient et dominoient communement sur tout le monde et n’avoient qu’un oeil seulement, c’est à dire leur intencion et regart à faire tous hommes et femmes qui s’i amusaoient devenir pierres descendans par leur pesanteur en abismes d’enfer. Mais nostre dit Sauveur Jhesuscrist par sa mort et Passion tencha la teste de la Meduse, qui l’oeil dessus dit portoit. Et par son precieux sang qu’elle espandit la fontaine de vie sourdit.
