1399-1400
CHRISTINE de PISAN, Epistre d’Othea, 28
Texte
Cadmusa moult amé et prisiez
Et si disciple auctorisiez
Soient de toy, car la fontaine
Gaigna du serpent a grant peine.
Glose
Cadmus fu un moult noble homme et fonda Thebes, qui cité fu de grant renommee. L'estude y mist, et lui meismes fu moult letrez et de grant science, et pour ce dist la fable que il dompta le serpent a la fontaine, c'est a entendre science et sagece qui toudis sourt. Le serpent est notté pour la peine et travail qu'il couvient a 1'estudiant dompter ains qu'il ait science acquise. Et dit la fable que il meismes devint serpent, qui est a entendre que il fu maistre et corrigeur des autres. Si veult dire Othea que le bon chevalier doit amer et honnourer les clercs letrez qui sont fondez en sciences. A ce propos dit Aristote a Alixandre: «Honneure sapience et la fortiffies par bons maistres»,
Allegorie
Cadmus, qui dompta le serpent a la fontaine, que le bon chevalier doit amer, pouons entendre la benoite humanité de Jhesucrist,d qui dompta le serpent et gaigna la fontaine: c'est la vie de cest monde que il passa a grant peine et a grant travail, dont il ot parfaicte victoire quant il ressucita au .III. jour, si que dit saint Thomas: «Tercia die resurrexit a mortuis».
