1315-1328
Ovide Moralisé, IV, 5116-5381
Dessus avez la fable oïe
Coment Ino, par desverie,
Cuida son til et soi noier;
Com Venus vault por aulz proier
Neptunus, et tant l'en pria,
C'ambedeus les deïfia.
Cadmus dou deïfiement
Ne sot riens, mes ploreusement
Plaignoit la perte et le damage
De sa fille et de son lignage.
Grant duel demaine et grant complaint.
A soi meïsmes se complaint
De Fortune, qui le guerroie.
Desormais li falt toute joie.
Trop a son cuer a grant meschief.
Or renou vele derechief
Sa perte et ses dielz trespassez
Or a duel et angoisse assez.
Onques nul jor n’ot tant leesse
C'or n'ait plus doleur et tristesce.
Dolens est et desconseilliez.
Sa terre lesse, et essilliez
S'en fuit en estrange contree.
Sa fame en a o soi menee,
Si ont tant lor chemin tenu
Qu'en Illirique sont venu.
La vesquirent a grant poverte.
Souvent regrete sa grant perte.
Cadmus, li dolens entrepris.
Povres est et nus et despris.
Gaaigner li convint son vivre
Et laborer, se il vau1t vivre.
A grant poverte, a graut haschie
Usa sa dolereuse vie.
Sonvent recorde son damge
Et la perte de son lignage,
Si dist: "Par ma grant mescheance
Tresperçai dou fer de ma lance
Le serpent, qu' au fust atachai
De l'arbre ou je le cloufichai,
Dont des dens, qui furent semez,
Nasquirent chevaliers armez.
Ains puis que j'ocis le serpent
Dieu ne me vint. Je m'en repent.
Et traire en vueil la penitance.
Se Diex eu veult prendre vengance,
Bien vueil sa sentence tenir,
Et se ce me doit avenir
Que la vois dist que je seroie
Serpens, bien vueil que je le soie
Por le serpent qui fu pendus"
Lors s'est sor son ventre estendus.
Serpens devint, si endurci
Sa pel eschardeuse et nerci.
Yers terre s'adente et s'acline
Sor son ventre et sor sa poitrine.
Ses cuisses vont recorbelant.
Cadmus plore et vait apelant
Sa feme, et ses deus bras li tent.
Eudementres come il entent
A sa feme, qu'il aparole,
Il a perdue la parole,
Et sa langue, sans atendue,
S'i est en deus forchons fendue,
Si sifla, c'autre son n'avoit.
Sa feme, qui mué le voit,
Plore et brait et bat sa poi trine,
Et dessus le serpent s'encline,
Et prie Dieu que il la face
Serpent, tel com cil qu'ele embrace.
Merveilleusement s'esbahirent
Cil qui ceste merveille virent,
C'andui sont serpent devenu.
En un bois sont rampant venu.
La se repondrent et mucierent.
Onques nul home ne blecierent
Ne n'orent taleat de mal faire,
Ains sont paisible et debonaire,
Si vont tout home deporant.
Liber les vait reconfortant,
Et moult lor fet grant avantage.
Cil est estrais de lor lignage,
Si est par le monde honorez,
Pour dieu servis et aorez.
- Or vous dirai, selone l'istoire,
Comment la fable fet a croire
De Cadmus, qui serpens devint.
Cadmus a tel poverte vint,
Que pour sa lasse vie aquerre
Li convint laborer en terre,
Si avoira la prophecie
De la vois qu'il avoit oïe
Le jor qu’il ocist le serpent.
Or le convient estre serpent.
Sor son pis, come serpentine,
Aus vignes taille et fuet et bine,
Si gaaigne ensi ses despens.
Libers aliege son espens
Et sa poverte et sa misere,
C'est cil qui l'art et la manere
Des vignes faire nous aprist,
Quar a vigneronier se prist,
Pour soi repestre et sa mesnie.
- Or vous dirai l'alegorie.
Cadmus, selonc m'entencion,
Note la generacion
De Judas, qui premierement,
Se l'Escripture ne me ment ,
Se parti d'Egipte essilliez,
Esbahis et desconseilliez
D'avoir certaine demorance,
Mes Diex, sulaus de Sapiance,
Le volt conduire et conseillier
Et le buef a conduit baillier
Qui droitement le conduiroit
La ou il se herbergeroit,
Par le buef qui n'issi onc liez
Est Moïses signifiez,
Qui frans sans servitute estoit:
C'est li bues, qui en sa teste oit
Deus cornes, si comme il disoient
Qui en la face l'avisoient:
Ce fu deus rais resplendissables,
Qu'il ot ou chief aparissables.
C'est li bues qui Judas mena,
Et qui droitement l'assena
En terre de promission
Ou Juda fist sa mancion.
C'est cil cui s'entente et sa cure
Mist en la devine culture,
Qui en l'arbre ou desert ficha
Le serpent., c'au fust cloficha.
Si traist de la sainte fontaine,
C'est de Dieu, l’iaue vive et saine
De saluable sapience,
Si sema la sainte creence
Et la loi dou Viez Testament,
Puis fu en grant predicament
Et regnans en prosperité
Juda, mes por l'iniquité
De ceulz qui de lui descendirent
Et dissoluement vesquirent
Ala ses regnes definant
Et ses lignages declinant,
Et par sa dissolucion
La terre de promission
Perdi et son propre heritage,
Si eheï en autrui servage
Et fu vagues et essilliez
Et par le monde esparpeilliez,
Povres et plains de desconfort.
Mes Liber li fet grant confort,
Qui de son lignage est estrais,
C'est Diex, par cui Judas fu trais
Des mains de ses persecutors.
Li delivrerres, li tutours.
De Juda que tant pot amer
Que sauvement passa la mer,
Liber, qui la vigne planta,
Et puis ou desert le tempta
- Et tel merite l'en rendi,
Que par envie le pendi!
C'est li roisins, qui. fu pendus
Et pressoriez et estendus
Ou pressour dou fust glorieus,
Qui de son saint sanc precieuz
Nous raaint tous et delivra.
C'est cil qui la terre enivra
De joieuse fertelité
Et d'abondant prosperité.
En vin lava sa vesteure
Et en sanc taint sa couverture.
C'est Libers, li vrais delivrerres,
Li vrais salus et li remberres,
Par cui Judas doit estre saulz,
Qui tant li seult faire d'assaulz!
Juda, qui dou fer de sa lance,
Par en vie et par ignorance,
Si com tesmoignent li escript,
Tresperça le cors Jhesu Christ,
Celui qui tout puet et lout voit,
Le serpent, qui trois chiez a voit ,
Qu'il est Diex uns en trinité
Et tribles en simple unité,
C'est li serpens qui fu pendus
Et ou fust de l'arbre estendus,
Des cui dens en terre semez
Nasquirent chevaliers armez,
-C'est a dire: par sa doctrine
Et par sa sainte descipline
Qui de sa sainte passion
Et de sa resurrection
Furent tesmoing et nonceour:
Ce sont li fort bateilleour
Armez des armes de joustise
Et de la foi de sainte iglise,
Li saint martir, li saint desciple,
Qui lors cors mistrent a dessiple
Pour la foi Dieu croistre et noncer
Et pour sainte iglise avancer.
Ce sont cil qui por Dieu morirent
Et les honors dou mont despirent.
A grant honte et a grant meschié
Compere Judas son pechié:
Dolentement use sa vie,
Mes, si com dist la prophesie,
Uns temps ert qu'il se reprendra
De sa felonie et vendra
A penitance et a merci,
Et moult avra le cuer nerci
De ce qu'il s'est vers Dieu mesfais.
Il se rendra de ce mesfais
Vers Dieu coupable et repentant,
Et sa poitrine ira batant
A genoulz, enclinez vers terre,
Et por misericorde querre
Ira vers Dieu ses bras tendant
Et chaudes lermes espandant.
Lors sera sa langue fendue,
Qu'il metra toute s'entendue
A confesser sa foloiance
Et a exaucier la creance
De Jhesu Christ et de son non.
Ne vaudra croire se lui non.
Adont devendra li lignage
Judas serpens soutis et sage,
Serpens qui de toute malice
Despoullera sa viez pelice
Sous le destroit de repentance,
Par l'aspresce de penitance,
Et pour la sorde oreille faire
A l'enchanteour de put'aire,
Qui les musars enchantera,
C'iert Antecris, qui se fera
Au monde croire et aorer,
Pour Dieu servir et honorer,
Si prometra dons et richesses,
Honors et mondaines nobleces
A ceulz qui croire le vaudront,
Et les bons, cui le mescroiront,
Fera livrer a grief martire.
Judas li serpens, por despire
La vois de son enchantement,
Ses dons et son manecement,
L'une oreille emplira de boe
Et en l'autre metra sa coe,
Quar les honors et les richesces,
Les avoirs et les gentillesces,
Les promesses d'or et d'argent,
Dont il enchantera la gent,
Tendra pour boe et pour ordure,
Et por l'ame, qui tous jors dure,
Garder de paine perdurable
Vaudra contrester an diable
Et tout son cors abandoner,
Quar, por prometre ne doner,
Pour perdre ne pour enrichir
Ne se vaudra vers lui fiechir,
Ains recevra joieusement
La mort mondaine et le torment,
Pour vie pardurable avoir.
Se mort li convient recevoir
Liber le reconfortera,
C'est Dieu, qui le delivrera
De tout mal et de tout contraire.
Si confondra son adversaire.
