Semfc38

sec. IV d.C.    

DECIMI MAGNI AUSONII, Opuscula, XX, 2

Testo da: www.centrumlatinitatis.org/testi_latini/Ausonii/OpusculaOmnia.txt

Cupido Cruciatus

Aeris in campis, memorat quos musa Maronis,

myrteus amentes ubi lucus opacat amantes,

orgia ducebant heroides et sua quaeque,

ut quondam occiderant, leti argumenta gerebant, 

errantes silva in magna et sub luce maligna

inter harundineasque comas gravidumque papaver

et tacitos sine labe lacus, sine murmure rivos.

Quorum per ripas nebuloso lumine marcent

fleti, olim regum et puerorum nomina, flores:

mirator Narcissus et Oebalides Hyacinthus

et Crocus auricomans et murice pictus Adonis

et tragico scriptus gemitu Salaminius Aeas;

omnia quae lacrimis et amoribus anxia maestis 

exercent memores obita iam morte dolores:

rursus in amissum revocant heroidas aevum.

Fulmineos Semele decepta puerpera partus

deflet et ambustas lacerans per inania cunas

ventilat ignavum simulati fulguris ignem.

Irrita dona querens, sexu gavisa virili,

maeret in antiquam Caenis revocata figuram.

Vulnera siccat adhuc Procris Cephalique cruentam

diligit et percussa manum. Fert fumida testae

lumina Sestiaca praeceps de turre puella.

Et de nimboso saltum Leucate minatur