1399-1400
CHRISTINE de PIZAN, Epistre d' Othea, cap. 69
Testo da: Parussa G., edizione critica, Droz 1999, pagg. 295-296
Texte
Se bien aimes chiens et oyseaulx,
D' Antheon, li gent damoiseaulx
Qui serf devint, bieute souviengue,
Et gard qu' autant ne t' en aviengue.
Glose
Antheon fu un damoisel moult courtois et de gentilles condicions et trop amoit chiens et oyseaulx. Et dit la fable que un jour chaçoit tous seulz par une forest espesse ou ses gens l' orent adirè. Adont comme Dyane la deesse des bois eust chaciè par la forest jusques a heure de midi, si fu eschauffee et ardant pour l' ardeur du soleil pour quoy talent lui prist d' elle baigner en une fontaine clere et belle qui la seoit, et comme toute nue fust en la fontaine, avironnee de nimphes et deesses qui la servoient, Antheon, qui garde ne s' en prenoit, s' embati sus elle et la deesse vid toute nue, a qui pour sagrant chastetè la face de honte rougi et moult fu dolente. Si dist adont: «Pour ce que je sçay que les damoiseaulx se seulent vanter des dames et des damoiselles, affin que vanter ne te puisses que nue m' ayes veue, je te touildray de parler poissance». Adont le maudist et tantast Antheon devint cerf ramages ne il ne lui remaint de sa forme humaine fors seulement l' entendement, dont il plain de grant douleur et de soubdaine paour aloit fuyant par le boscage. Et tost fust accuelli de ses propres chiens et par la forest l' aloyent cerchant, mais or l' ont trouvè et ne l' ont congneu. La fu atterrez Antheon qui devant sa gent pleure a grosses gouttes et voulentiers leur criast mercis se parler peust. Et des lors commencierent les cerfs a plourer. La fu Antheon occis et mardrez a grant doulor de sameismes masgnee qui en pou d' evre l' orent tout devorè. Sur ceste fable peuent estre faites maintes diverses exposicions, mais a nostre propos pot estre un jouvencel qui tout s' abandonnoit a oysivetè et tout despendi son avoir et sa chevanche ou delit de son corps, et en deduit de chance et en tenir maignii oyseuse. Par ce peut estre dit que il fu hays de Dyane, qui notte chastetè, et devourez de sa preopre gent. Pour ce veult dire au bon chevalier que il se gard d' estre destruit on meismes cas; et dit un sage: «oysivetè engendre ignorence et erreur».
Allegorie
Antheon, qui cerf devint, pouons entendre le vray penitent qui pecheur souloit estre; or a maté sa prpre char et faite serve a l’esperit, et pris l’estat de penitence. Et dit saint Augustin sus le Psaultier que penitence est un fais bien aysié et un charge legiere, et ne doit estre appellee fais d’omme chargié, mais esles d’oyseaux volant, car ainsi comme les oiseaulx portent en terre la charge de leurs esles, et leurs esles les portent au ciel, aussi se nous portons en terre la charge de penitence elle nous portera au ciel. A ce propos dit l’Euvangile : « Penitenciam agite, appropinquabit enim regnum celorum ». Mathey III° capitulo.
