1316-1328
Ovide Moralisé, Lib. II, vv. 4937-5138
Testo tratto da: De Boer C., Ovide Moralisé. Poème du commencement du quatorzième siècle publié d’après tous les manuscrits connu, Amsterdam 1936
- Ore a son oncle detrenchié
Lynus, et son pere vengié
Et ses freres, qui mort estoient,
S'a mort ceulz qui mort les avoient,
Puis tint le regne en heritage.
Or vueil revenir au message,
Qui l'aumaille avoit traite au port.
La se soloit, a grant deport,
Eüropa, la fille au roi,
Esbatrc a son riche conroi.
Ses peres ot non Agenor,
Qni de Sydoine tint l'ennor.
Cil ot quatre enfans de s'espouse,
Trois jouvenciaux et une touse.
L'uns fu Phenix, roi de Phenice,
L’autre Cylis, roi de Cylice:
Cil dui de lor deux nons nomerent
Les deux terres ou ils regnerent.
Le tiers filz fu Cadmus le sage,
Qui premiers escript le langage
Et la clergie des grejois.
Vaillans furent les filz tous trois.
Or vous dirai de la pucele,
Eüropa, qui tant fu bele.
J e ne vueil pas lonc conte faire
A la soue biauté retraire,
Mes tant fu bele et avenant,
Que Nature, par convenant,
Ne peüst tant metre s'entente,
Que ja seüst former plus gente.
Jupiter ama la meschine.
Pour lui lessa forme devine;
Pour lui mist tout en nonchaloir.
N'est pas du tout a son voloir
Cil qui d'amours est entrepris:
Ja tant ne sera de hault pris,
Qu'amours nel face humelier.
Amonrs veult amans mestrier
Et maintenir en son destroit,
Si ne veult que nulz le mescroit.
Ja n'avront bone compaignie
Loiaus amonrs et seignorie,
Quar trop sont divers et contraire:
Amours est franche et debonaire,
Et seignorie est dangereuse,
Despiterresse et orgneilleuse,
Si veult que l'en la serve et craime,
Et amours veult que cil qui l'aime S
oit frans et douz et amiables,
Debonaires et serviables,
Si veult avoir per, et non mestre.
Le dieu poissant, le roi celestre,
Jupiter, qui tone et espart,
Qui les foudres jete et depart,
Ne pot contre amours force avoir:
Amer l'estut par estouvoir,
Et devenir loiaus amis.
Amours en tel broie l'a mis;
Qu'a autrui l'estuet obeïr,
Dont ne se doit nulz esbahir,
S'aucuns amans d'amours assote,
Quar qui bien aime il ne voit gote.
Li dieus assote pour amer.
Prez dou rivage de la mer,
Souz Tir, en une praierie,
Pessoit la reaus vacherie,
Et dieux, cui fine amour sousporte,
La ou la bele se deporte
La divine forme lessa
Pour la bele, et tant s'abessa,
Qu'il en deigna bues devenir,
Et com bues se vault contenir.
O les bues aloit desnoiant,
Et par les prez esbanoiant.
Cil bues avoit la coulour blanche
Plus que novele nois sor branche
Qui n'est foulee ne remise.
La teste ot bien faite a devise,
Et la chiere simple et paisible.
N'avoit pas le regart orible,
Mes agreable et bien plesant.
Plus cleres de cristal luisant
Ot les cornes et petitetes:
De tel mesure furent faites,
Qu'on les peüst ou poin comprendre.
Ou pis devant veïst l'en pendre
Grans palaires, et gros redouble
Ot ou col. Biaus fu, mes trop double
Sa biauté par sa grant simplece:
Nullui ne fiert, nullui ne blece,
Ains est simples et sans desroi.
MouIt s'esbahist la fille au roi
De la grant biauté qu'ele i voit
O la simplece qu'il avoit.
Moult se delite au regarder.
El l'atonchast, mes retarder
L'en fet paours et coardie.
En la fin s'est tant enhardie,
Que dou toriel s'est aproucie.
A ses mains quieult l'erbe deugie,
Qu'el donne an toriel a mengier.
Cil, qu'Amonrs tient en son dangier,
Les beles mains li leche et baise.
Moult a delit et joie et aise,
Et moult s'esjoïst dou present.
Se la n'eüst qu'eulz en present,
Ja parfeïst son desirrier:
A paines s'eu puet consirrier.
Moult s'envoise et moult se deduit.
Grant joie en maine et grant deduit
Pour la bele qui le tastone
Et chapelés de flours li done,
Si vait par l'herbe deduiant,
Et com uns autres bues muiant.
Tant a cil la bele enchantee,
Que sor le dosli est montee
Cele, qui ne le cognoist pas.
Li dieus l'enporte pas pour pas,
Tant qu'il se boute en mer parfonde.
Des lors s'en court par la grant onde,
Et sor son dos sa proie emporte.
Trop s'esbahist et desconforte
La pucele, et trop a grant doute.
Le rivage esgarde et la route
Des puceles sor le rivage,
Qui grant doute ont en lor corage
De lor dame, que ravir voient:
Des oeulz en plorant la convoient.
La pucele biau se contient:
La corne a la destre main tient,
Et l'autre sor le dos li met.
Li dieus de nagier s'entremet,
Tant que mer passe. En Crete vient;
En sa droite forme revient;
Descouvert li a son corage,
S'a de lui pris le pucelage,
Dont molt fu liez et esjoïs.
Lors fu Mynos engenoïs,
Qui toute ot Crete a justisier.
Molt ot en lui bon justisier,
Tant que, se la fable ne ment,
Par lui sont fet li jugement
D'enfer, et li felon jugié
Lonc ce que chascuns a pechié.
Jupiter dou non de s'amie
Sornoma la tierce partie
Dou monde, et Europa l'apele,
Si fist de li don a la bele.
- L'estoire dist qu'ensi avint
Que Jupiter de Crete vint,
Dont il ot le regne a tenir,
Si come amour le fist venir,
En Tyr, ou la bele manoit
Pour cui amour il forsenoit.
En Tyr a la bele ravie,
Et porta par mer, a navie
Ou il avoit un toriel paint:
Pour ce la fable dit et faint
Que samblance de buef avoit,
Et non porquant tant d'art savoit,
Que de legier, s'il li seïst,
En guise de buef se meïst,
Ou d'autre forme se couvroit,
Par magique, dont il ouvroit.
Eusi pot il ravir la bele,
Et tolir li non de pucele.
- Autre sentence puet l'en metre,
Qui bien s'acorde a ceste letre.
Cil Dieus en cui tous biens habonde,
Cil Dieus qui fist et mer et monde,
Et gouverne le firmament,
Si fet par son commandement
Plouvoir, tonner et espartir,
Fouldres espandre et departir,
Si fist la lune et le soleil,
Et au gignement de son oeil
Fait trambler toute creature,
Por l'amour d'umaine nature
Se vault descendre et abessier,
Sans sa di vinité lessier,
Si s'en vint vers Sidoine eu Tyr,
C'est: en ce monde, sans mentir,
Pour raiembre l'umain lignage
Et giter d'infenal servage.
D'umaine forme se couvri.
Tant s'abessa, tant s'apovri
Por nous Cil ou tous biens habonde,
Qn'il ot fain et soif en ce monde ,
Et mainte tribulation,
Puis souffri mort et passion
Por nous, si fu menez a paine,
Aussi come buef que l'on maine
Au sacrefice souffrir mort.
Au tiere jour suscita de mort,
Puis enporta l'umanité
Aus cieulz avueuc sa deïté.
La regne en pardurable gIoire,
- Ce devons nous fermement croire -
Si vendra jugier mors et vis,
Et donner aus bons Paradis,
Et aus mauves, o le dyable,
Torment et paine pardurable.