1316-1328
OVIDE MORALISÉ, I, vv. 311-340
Testo tratto da: Ovide moralisé, poème du commencement du quatorzième siècle, par C. de Boer, Johannes Müller, Amsterdam 1920
vv. 311-340
Lors fu fais homs, si fu doutance,
selonc la paiene creance,
Qui la vérité n'en savoit,
Se cil Ouvriers qui tout avoit
Forgié, cil ou touz biens habonde,
Dieus, ymages de meillor monle,
C'est d'ome fet a sa samblance,
Liot de devine semance
Donnee forme et criement,
Ou la terre, qui freschement
Ot esté du ciel departie,
Retenoit aucune partie
De la celestial semance.
- Li filz Japeti, sans doutance,
Prometheüs, qui mout savoit
De terre et d'iaue, fet avoit
Une ymagete a la samblance
Des dieus, qui toute ont la poissance
De toutes choses ordener.
La glose dist que, pour donner
A l'ymage esperit de vie,
Ot du chars du Solail ravie
Une luisant faille enflamee,
Dont il ot l'image animee.
Et tout aient les autres bestss
Vers la terre enclines les testes,
Haut visage a home donna:
Tel le fist et tel l'ordonna
Que le ciel voie a son voloir,
S'aille a deus piez, dreciez vers l'air.
vv. 407-453
D'un poi de terre limonee
A Dieux forme a home donee,
Mes tant li fist il d'avantage
Qu'a sa samblance et a s'ymage
Le fist, si qu'homs le connneüst,
Et qu'il l'amast et chier l'eüst,
Si li espira par sa grace
Esperit de vie en la face.
Mout fu la matire despite,
Mes la forme fu tres eslite,
Quant a la forme au roi celestre
- Quar nulle meillor ne puet estre –
Fu fais homs. Chier se doit tenir,
Et mout li doit bien souvenir
Que Dieus li a fet haute grace.
Gart soi que vers Dieu ne mesface,
Ençois le serve, et si l'aore,
Et con son droit seignor l'onore,
Si se tiengne en humilité;
Membrer li doit qua de vilté
Soit estrais, et criez de boë.
Ne face orgueil, ne ne maint moë,
Ains se tiengne en subjection
Vers Dieu, par bone entention,
Si ne mete aillours sa pensee.
Pour ce vait il chiere levee,
Vers le ciel eslevé le vis,
Sor deus piez dreciez, ce m'est vis,
Que tous ses cuers et sa creance
Et sa pensee et sa beance
Doit estre en choses souveraines:
Ne li chaille des terriaines:
Penser doit aus choses devines.
Les autres bestes vont enclines
Contre terre, et d'el ne lor tient,
Quar terre les paist et soustient.
Celes n 'ont raison ne mesure;
Homs est plus noble créature,
Si doit, puis qu'il a cognoissance,
A voir ancune differance
Entre l’ome et la beste mue,
Qui n’a raison ne entendue:
La mue n’a riens ou penser
Fors a son cors paistre et tenser;
Homs doit penser a sauver s’ame,
Qui dou cors est mestresse et dame.
Et a deservir paradis.