370-404 d.C.
CLAUDIANO, Panegyricus dictus Honorio Augusto quartum consuli, VIII, 228-254
Testo tratto da: Claudiano, Carmina, with an english translation by Platnauer M., 2 voll., The Loeb Classical Library, Cambridge-London 1922
[…]Cum conderet artus
nostros, aetheriis miscens terrena, Prometheus,
sinceram patri mentem furatus Olympo
continuit claustris indignantemque revinxit
et, cum non aliter possent mortalia fingi,
adiunxit geminas. Illae cum corpore lapsae
intereunt, haec sola manet bustoque superstes
evolat. Hanc alta capitis fundavit in arce
mandatricem operum prospecturamque labori;
illas inferius collo praeceptaque summae
passuras dominae digna statione locavit.
Quippe opifex veritus confundere sacra profanis
distribuit partes animae sedesque removit.
Iram sanguinei regio sub pectore cordis
protegit imbutam flammis avidamque nocendi
praecipitemque sui. Rabie succensa tumescit,
contrahitur tepefacta metu. Cumque omnia secum
duceret et requiem membris vesana negaret,
invenit pulmonis opem madidumque furenti
praebuit, ut tumidae ruerent in mollia fibrae.
At sibi cuncta petens, nil conlatura cupido
in iecur et tractus imos compulsa recessit,
quae, velut inmanis reserat dum belua rictus,
expleri pascique nequit: nunc verbere curas
torquet avaritiae, stimulis nunc flagrat amorum,
nunc gaudet, nunc maesta dolet satiataque rursus
exoritur caesaque redit pollentius hydra.
